मनात आले माझ्या जे . .


मनात आले माझ्या जे
तुझ्या मनातही आले का
भेट जाहली स्वप्नात सखे 
दोघांची ती स्मरते का ..

रेघा मारत वाळुत बसलो
मनातुनी त्या पुसल्या का
लाटा लाटा मोजत हसलो
पुन्हा कधी त्या दिसल्या का ..

क्षणाक्षणांचे जमाखर्च ते
मनात माझ्या जपले ग
शिल्लक दोघांची किती
पाहण्यास मन टपले ग ..

भेटायाचे कधी न आपण
किती कितीदा ठरवत रुसलो
ते सत्यात न कधी उतरले
स्वप्नात सदा मिरवत फसलो ..

विसरू म्हटले तरी विसरणे
अशक्य वाटे ह्या जन्मी
जवळ येउनी दूर सारणे
जमते का बघु पुढल्या जन्मी ..
.

कोणत्याही टिप्पण्‍या नाहीत:

टिप्पणी पोस्ट करा